E Ya Allah neu tulong kamoe
Sayang that nanggroe ka haro hara
Ie raya Aceh sayang wareh droe
Gampong ka phangphoe tijoh ie mata
Rame meuninggai agam ngon binoe
Wareh sinaroe rumoh tanle na
Aneuk yatim ramee lom jinoe
Sayang Aceh nyoe sabab ie raya
Blang rusak jalan pih hanco
That le jalo gadoh dimata
Aneuk manyak ka abeh jimoe
Teumakot keudroe ban trok ie raya
Akhe 2004 masa saboh ro
Aceh ka phangphoe tsunami teuka
Musibah jinoe trok lom u nanggroe
Neutulong kamoe E Ya Rabbana
Ujeun jitoh dua lhee uroe
Ureueng lam nanggroe hana geu sangka
Teuka ie raya di Aceh thon nyoe
Mulai Krueng Panjo trok Samalanga
Aceh Utara ka ngob ngon toko
Ka hanco moto bak jalan raya
Putoh titi rakyat meupaloe
Tajak u Gayo payah lagoina
Le gampong ka hanco phangphoe
Rakyat payah moe seudeh lagoina
Tan le seumangat ureueng jak meugo
Ka kheundak bak Po Allah Taala
Aceh Tamiang seudeh kawom droe
Ban sigom nanggroe ka Allah coba
Musibah Aceh rakyat geu ujoe
Beu ingat keu Po bek darohaka
Beu na saba wahe rakyat droe
Jaga nanggroe bek le trok bala
Sembahyang limong bek tuwo tanyoe
Doa bak Po Aceh beutega
